إضغط لتفاصيل الإعلانات



Results 1 to 3 of 3
Share
  1. #1
    Join Date
    Jan 2008
    Posts
    1,785
    Rep Power
    13

    Default عاااااااااجل حقيقة وائل غنيم


    حاولت مرارا و تكرارا أن أمسك نفسي عن الرد على كل ما أقرأه من إتهامات لوائل غنيم, لكن بصراحة, مش قادر أسكت أكتر من كدا, أولا أحب أوضح إن ماليش أي علاقة بوائل ,ولا أعرفه على الصعيد الشخصي أو العملي, لكن أنا فعلا مستفز بشدة من كمية الغباء و الإنسياق الأعمى وراء الثورة المضادة إللي دعمها شوية ناس ما عندهمش منطقية في التفكير بجد و إللي مالين البلد دي و أضروها طول عمرها بجهلهم أكتر من الفساد إللي كلنا عارفينه, يعني زي ما بيقول المثل: عدو عاقل خير من صديق جاهل

    أولا: ترجمة جوجل
    إنتوا عارفين شغلانة وائل غنيم إيه بالظبط في جوجل؟ مدير تسويق, يعني من الآخر كدا, بيبيع خدمات جوجل و إللي معظمها تسويق على الإنترنت, يعني الراجل شغلو ملوش علاقة بنظم التطوير داخل جوجل وإللي أعداد الموظفين فيها بالآلاف و لا تخضع لسيطرة مدير مدير مدير وائل أصلا, لإنها في إدارات تانية خالص, يعني إللي بيقولو إن دي مشكلة وائل, زي إللي يروح شركة إتصالات و يوقف عند الراجل بتاع الخازنة إللي بتدفع له فواتيرك, و يمسك في رقبته ويقوله: إنتوا ليه طلعتوا يسرا في إعلانكوا و ماجبتوش عادل إمام, يبقى إيه رأيك في الموقف ده؟ تقول على الزبون محب عادل إمام إيه بالظبط؟

    و إن كان منصب وائل و سياسة الشركة تسمحله إنه يبعت و يقول يا جماعة فيه غلط في حاجة في أحد منتجاتنا أو خدماتنا, و ده إللي و ائل عمله باختصار في الفترة إللي فاتت, و للأسف إللي إنتوا ما تعرفوهوش طبعا إن معظم الشركات العالمية إللي سيادتكم بتستخدموا خدماتها بداية من إنتل إللي بتصنع البروسيسور لجهاز الكمبيوتر إللي إنت قاعد عليه حاليا, و إنتهاءا ببرامج الموبايل التافهة , فرق البحث و التطوير بتاعتها لا تخلوا من موظفين يهود أو إسرائيليين, عارفين ليه؟ عشان النظام إللي كان حاكمك 30 سنة كان موجه طاقة شبابك كلها لماتشات الكورة و الفيديو كليبات و إللي عاوز يعمل حاجة بجد يهاجر يعملها برا بالإشتراك مع الشركات دي, يعني من الآخر لو عاوزين تلوموا حد على الترجمة إللي مش عجباكم, متهيألي عرفتوا تلومو مين

    ثانيا: علامة الأسد على التيشيرت
    كل البلد عرفت إنها علامة ماركة عالمية "جيوردانو" لكن الناس برده مش قادره تفكر, وناس راحت جابت تاريخ الماركة و إللي إخترعها و نسيو إنهم أول ناس كانت بتفتخر إنها لابسه هدوم "ماركة" و "سينييه" و لو سألت 99 في المية من الشعب عن معنى رموز الماركات دي, مش هيعرف, لكن عشان و ائل غنيم , لاااازم يعرف, و لازم يفتش و را كل ماركة بيشتريها, و مالناش فيه بقى لو خامتها محترمة أو تفصيلتها بتليق عليه, أو حتى بساطتها مريحاه, لكن لما تشوف راجل محترم و هيبة و زي الفل, حاطط علامة ال بلاي بوي "راس الأرنب" على عربيته, مش مشكلة, و ما حصلش حاجة, تلاقي معظمنا ما يعرفش معنى العلامة دي إيه, و هيروح حالا على جوجل "الوحش" يدور على معناها

    ثالثا: الحظاظة و إشارات اليد
    كل أو معظم المصريين في مصر, واحد من أحلامهم إنهم يشتغلوا في دبي, أو على الأقل يزوروها عشان عاوزين يشوفوا تجربة هونج كونج الشرق الأوسط دي شكلها إيه, و أنا واحد كنت عايش وشغال هناك, و أحب أقولكم إناللغة الرسمية في شوارع دبي هي الإنجليزية, لإنها خليط من 120 جنسية مختلفة عايشين في مدينة واحدة, وده مثال صريح وواضح على تطبيق العولمة في أعتى صورها, يعني سيادتك هناك بتخاطب كل الثقافات و الجنسيات و الحضارات, و كل واحد فيهم ليه ترجمة خاصة لكل إشارة من إيده, يعني لو رحت لواحد كوري و شاورتله بإيدك بصباعك السبابة, تعتبر إهانة لا تغتفر, و جنسيات أخرى لو شاورت بإصبعك الإبهام زي ماحنا بنعمل هنا علامة ال"كله تمام" تعتبر عنده زي ماحنا بنستعمل الإصبع الأوسط "ومتهيألي فاهمين من غير توضيح المعنى عندنا" فلو حبيت تختزل كل الإشارات و العلامات و التعبيرات و الألوان إللي موجودة في مدينة زي دبي, يبقى هتعيش من غير هدوم و مش هتتحرك من مكانك طول اليوم, و الكلام ده يعرفه كويس جدا المغتربين هناك ولو أنا لابس ساعة نفس ماركة الساعة إللي لابسها نتنياهو شخصيا, مش هستغرب لإن إحنا في نفس العصر إللي خلاك تشوف إللي بيحصل في العالم كله بدوسة زرار, لكن لما تفكيري يكون من 1980, يبقى العيب فيا أنا و في قدرتي على الإستيعاب, و ده السبب الرئيسي لسقوط النظام البائد

    رابعا: البكاء من غير دموع في برنامج منى الشاذلي
    حد فيكم ممكن يقوللي لو مكان و ائل في أمن الدولة كان هيبكي قد إيه لمدة ال 12 يوم دول؟ و ممكن دكتور عيون يحكيلنا شوية عن جفاف الغدد الدمعية؟ ولو فاكرين منظر عيون وائل ساعة البرنامج كانت وارمة قد إيه؟ إنتوا عاوزينة يقولكم إيه؟ كنت عمال أعيط طول الفترة دي من الرعب و إللي كان ممكن يحصل فيا؟

    خامسا: الكذب
    تعالوا الأول في النقطة دي نتفق إن وائل صغير في السن, و مهما كان ناضج أو متفتح الفكر لكن خبرته قليلة مقارنة مع الساسة المحنكين إللي طول عمرهم حاكمينا, و بناء عليه, من السهل جدا إن ضباط أمن الدولة يقولوله لو قلت إنك إتضربت يبقى هتعمل حرب أهلية بين الشعب و الشرطة و الوضع متأزم جدا, و غالبا ده إللى أكده حسام بدراوي لما وصله بنفسه, وحتما و ارد جدا إنه إتهدد بإنهم ممكن يعملوا فيه أو في أهله حاجة لو قال إنه إتضرب, و لقاء منى الشاذلي كان بعد خروجه فورا, فكان لسا مش فاهم الثورة وصلت لفين, و لا إيه حجمها, و لا إذا كنا هنقدر نحميه أو لأ من بطش أمن الدولة وكل المعلومات إللي و صلتله إن فيه ناس ماتت, يبقى لو سيادتك مكانه, كنت هتقول إيه؟ لكن بعد ما نزل التحرير و فهم الحجم الحقيقي للثورة, و حس بحب الناس و حمايتهم لبعضهم, قال إللي كان مخبيه, عشان الناس ما ينضحكش عليها من أعوان النظام إللي عاوزينا نفتكر إن أمن الدولة دول خلاص, فهموا الدرس و مش هيعملوا كدا تاني, و بعدين كانوا عاوزين إيه من واحد مستضيفينه فورا بعد خروجه من أمن الدولة بعد 12 يوم, يفتكر هو كسر موبايله إمتى بالتحديد, و التاريخ و الساعة, ده ممكن لو كل واحد فينا إتغدى إيه أول إمبارح, لو عرفت تجاوب على السؤال ده يبقى نتكلم


    سادسا: فيديو الإختطاف
    هو مين أصلا إللي روج للفيديو ده و قال إن دي لحظة إختطاف وائل غنيم؟ أكيد و ائل نفسه هو إللي بعته و هو محبوس في أمن الدولة, صح؟ يعني رجعنا لثقافة القطيع, لما و احد بعت الفيديو ده على النت, الناس كلها قالت هو ده وائل, و بعتوه لبعض, و حاليا لما شوفنا و ائل كويس و عرفنا شكله, طلع الناس كلها بتقول إن ده مش وائل, طيب هو مين أصلا إللي قال إن ده و ائل؟ مش الناس برده؟ و ناهينا عن المحاولات إللي كانت في الأول بتقول إنه كداب برده, و قال إنه إتمسك بالليل و في الفيديو الصبح, هو مين إللي قال يا ناس إن إللي في الفيديو ده و ائل؟

    سابعا: أدمن الصفحة
    ودي من أكتر الحجات إللي فعلا مندهش إن الناس مش فاهماها, يا ناس يا خلق, الصفحة ممكن يكون ليها أكتر من أدمن, و أي واحد فيهم هيكتب حاجة على الوول هتطلع بإسم الصفحة, يعني إللي قال إنه ساكن في الإسكندرية هو الدكتور مصطفى إللي كان أدمن مع وائل, و في برنامج مصر النهارده, وهو ده اللنك للبرنامج عشان نفهم
    http://www.youtube.com/watch?v=o4fsrYFRZQo
    و بالتحديد من الدقيقة 5:00
    و ده يطلع منه تضارب التصريحات على الصفحة, و الستاتس إللي كانت بتتلغي بعد ما تتبعت و يعرفوا إنها غلط أو مش بتعبر عن الكل

    ثامنا: و أخيرا عشان كدا أكتر من اللازم: إزاي خرج من أمن الدولة أصلا
    النظام كان و لا زال محتاج لرمز للثورة عشان يشن عليه حملة تشويه, و ضمنيا يبيض وجهه بهذة الحملة, يعني: أكبر مشكلة واجهها النظام و كانت عملاله إرتباك شديد جدا إن ما فيش قيادة للثورة, و لما لقوا موضوع وائل غنيم ده, كانت فرصتهم إنهم يعملوه رمز, و يعرفوا يشوهوا الثورة ضمنيا عن طريق تشويه الرمز ده, يعني ما سابوهوش عشان سواد عنيه, سابوه عشان لقوله لازمة عندهم, و هم إللي روجوله إعلاميا, و نوهوا قبل خروجه بيوم كامل عشان يفرشو الطريق لوسائل الإعلام و يقولولهم دي فرصتكم عشان تاخدو السبق الإعلامي, و قاللو هيفرجوا عنه الساعة كام بالظبط و هم عارفين كويس إللي هيحصل و إنه هيتحول لرمز بسرعة, لكن إللي ما عملوش حسابه, إن بكاء و ائل في برنامج منى الشاذلي, مسح تماما كلام رأس النظام السابق من صدور الملايين إللي تاعطفت معاه


    كلمة أخيرة, الثورة لسا ما خلصتش, و خلو بالكم من وسائل الإعلام إللي لسا شغالة على نغمة الخسائر إللي لحقت بينا من الثورة و الكام يوم إللي فاتوا, و ما فيش حد فتحه بقه بإيه خسائر مصر طوال ال 30 سنة إللي فاتت, و لا حتى ال 10 سنين إللي فاتت كأحسن تقدير, و الإعلام لسا شغال بمبدأ حاوريني يا ويكا, و كلمة "ثورة الشباب" عشان يحجم الثورة في شريحة و احدة من المجتمع, و مش عاوزين يعترفوا إنها ثورة شعب بأكمله, كان معظمه خائف, لكن لو عاوزين العدد الحقيقي للثوار, دوروا على كام مصري نزل أو إحتفل بعد خطاب "التخلي" يومها

    و خطاب التخلي ده لوحده قصة عاوزين حد يفهمهالنا من الفقهاء الدستوريين, الرئيس مبارك كان يشغل ثلاث مناصب: رئيس الجمهورية, و رئيس الحزب الوطني, و القائد الأعلى للقوات المسلحة, هل بتخليه عن منصب رئيس الجمهورية يكون قد تخلى ضمنيا عن منصب القائد الأعلى للقوات المسلحة؟ و إذا كان هذا هو الوضع الصحيح, فمن هو القائد الأعلى للقوات المسلحة الآن, و ما دور عمر سليمان الآن و قد أصبح نائب بلا رئيس؟ و زكريا عزمي وقد أصبح رئيس ديوان بلا رئيس؟

    ولماذا هذا التأخير الغير مبرر لحبس حبيب العادلي و جرانة و عز؟ و أين بقية العصابة؟ و لماذا لم نسمع عن اللجنة اللتي تحقق منذ 3 أسابيع "كما قال الفريق أحمد شفيق" في الإعتداء على المعتصمين بالجمال و البغال؟ و من هم أعضاءها؟ و ما الذي و صلوا إليه الآن؟ و أين الضباط الذين إشتركوا في قتل الشهداء؟ و من هي اللجنة التي تبحث في هذا الموضوع؟ و ما الذي وصلوا إليه الآن؟ و كم هي محصلة رؤوس الأموال المملوكة لهذة العصابات التي أنهكت إقتصادنا؟

    لازال النظام يعمل بفكرة دعونا نعمل في صمت, و إبقوا قابلوني, و بالنسبة للمظاهرات الفئوية, عيب جدااا طبعا, خليك بتاخد 120 جنيه في الشهر, و خلي طقم رؤساء مجلس الإدارات بياخدو بالملايين, ولو الناس عملت إضرابات قلهم لأ عيب, الإقتصاد يا أولاد إتفرجوا على البهوات و إنتوا ساكتين, ما نقدرش نخصم من مرتبات البهوات و نوزع عليكم عشان ما يزعلوش و بعدين خليكم على الإنترنت دوروا على وائل غنيم الماسوني "إللي لابس حظاظة" إللي كان سبب من أسباب ثورتكم و إنهشوا فيه و كفاية ثورتكم المباركة الطاهرة لغاية كدا, و لو زهقتوا ممكن تطلعوا مصطفى محمود تبكوا على أيام النعيم و الأمان إللي كنتوا فيه, و إللي ظباط الشرطة لغاية النهارده بيحسروكوا عليها عشان تتربوا يا شعب ناكر للجميل, أو خلينا نبقى إيد و احدة و عاوزين نعرف مين الراجل إللي كان و اقف ورا عمر سليمان, زي ماجتمعنا كلنا إيد و احدة و حاربنا العدو الجزائري إللي كان هيسلبنا أعز ما نملك: كاس أفريقيا, وسيبونا بقى عاوزين نلم فلوسكوا و نحرق الأوراق و ندوخكوا لغاية ما تنسوا إيه الموضوع و نرجع لكم بوشوش جديدة, غالبا هيكونوا أولادنا و قارايبنا إللي مسكناهم المناصب المهمة في البلد لما كنتوا نايمين من 30 سنة

    أنا مش بقول نبطل شغل و نقعد نستنى المحاكمات أو القرارات, لأ, نروح الشغل, و نعمل فصول محو أمية لجيرنا البسطاء و ننضف الشوارع, و لما نقعد على الإنترنت و الفيس بوك و نكتب كلام أو ندور على حاجة, يا ريت نركز و نفهم إيه إللي محتاجين نحط فيه طاقتنا, و بلاش السلبية إللي عودونا عليها 30 سنة و عاوزين نرجع للمباريات الكرة و الفيديو كليبات و الكافيهات و و و , مش هو ده المنتخب إللي كنتم هتحاربوا الجزائر عشانهم؟ مش هم دول فنانين الجيل إللي كنتوا نازلين شتيمة في بعض عشانهم؟ ومش هم دول علماءنا إللي ما حدش كان بيعبرهم في البلد؟

    وسيبوا وائل أو غيره في حاله, الراجل قال مائة مرة إنه مش عاوز حاجة غير إن مصر تنضف, و لو رشح نفسه لمنصب إبقوا ساعتها علقوله المشانق, و سيبكوا من العالم الهبلة إللي بتقول ده عاوز يمسك وزير الإتصالات, لإن رئيس الجمهورية هو إللي بيعين , حكومته, مش بالإنخاب أو بمزاج الأفراد ووائل كدا عمل إللي عليه, و الباقي علينا إحنا إنسوووووه و

    يلا بينا نركز


    كتبه
    حسام عباس


  2. Facebook Comments - تعليقـك على الفيس بوك يسعدنا ويطور مجهوداتنـا


  3. Forum Ads:

  4. Forum Ads:

    اضفط هنا لمعرفة تفاصيل الإعلانات بالموقع


  5. Forum Ads:

    -->

  6. #2
    Join Date
    Feb 2011
    Location
    cairo
    Posts
    1
    Rep Power
    0

    Default

    مقال وافي فعلا

    الله يصلح حال مصر والمصريين
    ويكشف كل كاذب

  7. #3
    Join Date
    Jan 2008
    Posts
    1,785
    Rep Power
    13

    Default

    يارب يامنى نعدي مرحله التخوين ده على خير
    الناس كلها بقت بتخون بعض
    وناسيين ان احنا في فتره لازم نبقى ايد وحده عشان مصر محتجانا كلنا

  8. Forum Ads:

Similar Threads

  1. Replies: 6
    Last Post: 04-08-2009, 01:17 PM
  2. حقيقة قرآنية (بالصور)
    By aboud87 in forum Engineers discussions
    Replies: 5
    Last Post: 01-02-2009, 10:35 PM
  3. هل تعلم حقيقة الكارثه الاقتصادية؟
    By hopy_braya in forum Engineers discussions
    Replies: 0
    Last Post: 29-11-2008, 10:29 PM
  4. موقف لا يحسدون عليه
    By hopy_braya in forum Engineers discussions
    Replies: 3
    Last Post: 25-10-2008, 11:20 PM
  5. تعرفت عليه ........فأحببته
    By mariam in forum Engineers discussions
    Replies: 11
    Last Post: 02-05-2008, 06:49 PM

Tags for this Thread

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  

أقسام المنتدى

الروابط النصية

تابع جروبنا على الفيس بوك

صفحة Egypt Engineers على الفيس بوك

تابعنا على linkedin

جروبنا على الياهو جروب