إضغط لتفاصيل الإعلانات



Results 1 to 2 of 2
Share
  1. #1
    Join Date
    Feb 2008
    Posts
    532
    Blog Entries
    2
    Rep Power
    13

    Question هل ترى فى اعتصام ميدان التحرير فائده لمصر

    انا كلمت كل اصدقائى اللى اعرفهم علشان انصحهم واقول لهم ان دى فتنه ولازم كل واحد يبعد عنه ويلتزم بيته
    فى منهم اللى قبل وفى منهم اللى رفض

    وانا بقول تانى يا جماعه مفيش حد فينا ينكر اننا كنا تحت ظلم وضغط
    ...وكلنا كنا ايد واحد يوم 28 يوم الجمعه
    بس خلاص كل مطالبنا اتحققت

    ايه فايدة القاعده فى ميدان التحرير
    ومحدش يقولى ان ايه الضمان
    لان لما رئيس دوله يخطب وكل العالم تشوف كلامه يبقى ده لوحده ضمان كافى جدا جدا جدا

    تانى حاجه
    كل واحد فينا معاه اللى يكفيه اسبوع شهر اتنين
    بس فيه ناس مش معاها الا قوت يومها بس

    الناس دى بدات تشحت بسبب الاغبيه وانا بقولها الاغبيه اللى فى دماغهم جزمه وقاعدين
    فى ميدان التحرير

    اللى الاجانب بيهتفوا وهمه بيرددوا وراهم زى البغبغنات

    ثالث شىء

    احنا عاوزين نغير رئيس ومجلس شعب ومجلس شورى ودستور فى نفس الوقت

    ياريت اللى بيقول كده يفهم دستور بلده ماشى ازاى

    ازاى انت هتغير دستور وانت عاوز تغير مجلس الشعب

    وازاى عاوز تشيل رئيس وانت عاوز تغير دستور

    الرئيس مبارك حلها

    قال ان مجلس الشعب الحالى هيغير الدستور
    وبعدين هيتحل تماما
    وبعدين الرئيس هيتغير

    يعنى فيه نظام ولازم نفهم ومنكونش بغبغانات ونروح نقعد فى ميدان التحرير بالاسبوع
    ويا عالم اللى قاعدين دول اخر مره استحموا فيها امتى

    حاجه اخيره
    كل واحد فينا فيه الحلو وفيه الوحش
    واذا كان فيه مساوىء حصلت فى عصر الرئيس مبارك
    فا ايضا فيه مزايا ومزايا كتير جدا
    واظن احنا عرفنا بعضها الفتره اللى فاتت

    لما البورصات العامله كلها هبطت ولما البترول ارتفع كله بسبب مصر بس

    ولما الاجانب كلهم والدول العربيه الغير شقيقه بداءت تهد فى مصر

    ومتنسوش مترو الانفاق ومتنسوش القريه الذكيه
    وتوشكى
    والسياحه
    وغير كل ده يكفى ان كل واحد فينا كان بيركن عربيته تحت البيت وهوه مطمئن

    دلوقتى احنا عرفنا قيمة الامن اللى كنا عايشين فيه

    الراجل اللى كان مع والدى فى حرب اكتوبر ده واللى كان ممكن يموت علشان انا وانت
    نعيش
    جاى دلوقتى انت ياللى ملكش لازم ومعملتش حاجه لبلدك تقوله اطلع بره

    وانا احب ارد عليك
    الراجل ده انا اشيله على راسى من فوق وليه كل الشرف
    واذا كان حد عاوز يطلع بره فا انت ياللى خنت بلدك وبهدلتها وفرجت كل العالم عليها
    وقعدت فى ميدان التحرير

    اللى كان اسمه زمان ميدان التحرير ويوم الجمعه 28 كان اسمه ميدان الحريه

    وانا للاسف بسميه دلوقتى ميدان العار لكل واحد قاعد فيه اوميدان الاخوان المسلمين
    ايا كان مش هتفرق كتير
    لانهم الاتنين زى بعض
    وادينا عرفنا مين همه الاخوان المسلمين

    والله حلال اللى كان بيجرى فيهم

    واللى ملوش كبير بيروح يشترى له كبير
    والرئيس مبارك كبيرنا وهيفضل كبيرنا ان شاء الله

    شكرا

    محمد عبد الغفار
    إذا كان عندك ملل من الدنيا وضيق في النفس وقلق وتفكير زائدين وخوف من المستقبل وعدم راحة في العيش ،، قل لا إله إلا الله محمد رسول الله ...
    فلديك نقص في الدين وستجده إن شاء الله بالصلاة والاستغفار وطاعة أوامر الله سبحانه وتعالى .

    Best Regards,
    MOHAMMED ELJOKER
    Security Engineer

    من مواضيع eljoker70000 :



  2. Facebook Comments - تعليقـك على الفيس بوك يسعدنا ويطور مجهوداتنـا


  3. Forum Ads:

  4. Forum Ads:

    اضفط هنا لمعرفة تفاصيل الإعلانات بالموقع


  5. Forum Ads:

    -->

  6. #2

    Default

    مش عارف أرد على الشتايم ده كلها إزاي (اغبيا..بغبغانات... حاجة ظريفة جدا وثقافة حوار محترمة... وكلام إن ده ريس مسئول بس عن الإنجازات وملوش دعوة بالمساوئ برده كلام كوميدي.
    الرئيس مبارك كإنسان من حقه محبة المحبين وعواطف المتعاطفين معه، لكنه كرئيس مسئول ليس فقط عن مجد الإنجازات التى تمت فى عهده، لكن أيضا عن الإخفاقات والتجاوزات التى تراكمت فى عقود حكمه، فثمة مفاسد هائلة وراء عمليات الخصخصة ونهب أراضى الدولة واستباحة حقوق الأجيال القادمة لصالح تجار الغاز لإسرائيل بأبخس الأسعار وقتل الأراضى الزراعية والمستصلحة باستثمارات مافيا بيزنس البناء الذين لم يكونوا بعيدين أبدا عن دوائر الحكم

    .وصحيح..الأستاذ محمد عبد الغفار وإنت يا جوكر...شفت اجانب بيهتفوا في التحرير.؟
    لو ماشفتش يبقى إنت بتقول كلام بدون سند وعايز فتنة عن طريق إنك تسخن الناس على اخوانك اللي في التحرير.. وميدان العار ده هو اللي جاب حق البلد كلها وفس ناس كتير كانت قاعدة في بيتها تحت البطانية بتتفرج عليهم ...بقى الراجل اللي قتل المصريين في ا شوارع والعبارة والدويقة وغيرها بطل اشيله فوق راسي واللي عايز حقه في حياه محترمة بدون فساد ولا طوارئ بغبغان..صحيح منطق مقلوب
    أنا إن الناس لازم تصدق الريس وال حكومة ده تهريج.. أحمد شفيق قال يوم التلات إن سلامة الناس في رقبتي ويوم الأرْبع البلطجية بتوع الحزب الوطني بتاع الريس كانوا بيقتلوا 8 منهم.. وإنت أعد في بيتكم بتقول انهم أغبيا وبغبغنات...
    خمستاشر وهم: ليه مبارك مش لازم يتنحى الآن..


    1.بابا حسني مبارك:
    أنا عندي هنا في أرض الجمعية في إمبابة نائب حزب وطني من ساعة ما وعيت على الدنيا وهو بيكسب في انتخابات مجلس الشعب, يعني على الأقل من حوالي 27 ساعة, هل المفروض لما أرض الجمعية يثوروا عليه و يطلبوا خروجه فورا من البرلمان أقول لهم و أنا متأثّر خالص: يا جماعة عيب..فين الأخلاق...بابا النائب يا جماعة..الناس الكويسين ميعملوش كده..ده طلع في الخطاب عمل عيشة و قال أنا آسف...يالا نسامحه يا جماعة!, ده خطاب تاريخي والله...يالا نعيط زي منى الشاذلي, لكل أصحاب نظرية احترام الكبير و زي أبوكو, السياسة و مصاير البلاد مفيهاش بابا و عمو, حرام عليكم, دلوقتي بقى زي أبونا بعد ما كان ظالمنا و ذاللنا و سايب علينا كلابه ينهبوا البلد, ..


    2.تسليم و تسلم السلطة بياخد ملايين السنين الضوئية:
    مبدئياً هو فيه حد لسه فاكر إن مبارك فعلاً واعي و مركّز و بيتابع كل شئون الدولة؟, يعني إيه الفرق لما مبارك يتنحى و عمر سليمان يعمل نفس اللي بيعمله مبارك دلوقتي, اللي هو بالمناسبة لاشيء, وأمنياً, وجود حسني من عدمه مش فارق, عمر سليمان هو اللي جاب وزير الداخلية الحالي, مش شغال فري لانس مع مبارك, و يقولك: هو إزاي يعني يمشي فوراً, هو بيسلّم كشك, طيب عشان هو فعلا مش بيسلم كشك ومش هنقعد نحسب معاه الإيراد و لا حيسلم عمر سليمان دفاتر المخزن و المرتجع, لازم مبارك يتنحى فوراً, تسليم و تسلم الدولة مش إن مبارك يقعد مع عمر سليمان يفتح معاه دفتر وزارة وزارة و شوف ياعم و خد عندك و إحسب معايا و إديني الإيراد و خلي بالك من دول و اعتقل دول!, هو كان يعني حسني مبارك كل يوم بيشوف أحوال البلد و متابعها و عارف كل حاجة فيها!, دي دولة منهارة محتاجة إنقاذ فوري, مش نقعد نسلّم في أمها شهور, لازم يتنحى فوراً, والمسئولين في كل مكان في مصر حيسلموا الأمور لعمر سليمان, متخافوش, وزير الري مش حياخد النيل و يرفض يسلمه لعمر سليمان, ولا مبارك حيروح شايله و هربان بيه.


    3.ارحموا عزيز قوم ذل:
    كان رحمك هو لما كنت بتتهان من أقل رتبة في الداخلية, كان رحم أختك من البهدلة في المواصلات و التحرش, كان رحم أبوك من سرقة رزقه لحساب أحمد عز و ابنه و مراته و أصدقائه, ليه بس حبيب العادلي هو اللي يتحاكم, مين اللي جابه للوزارة؟, مين المسئول الأول عن فساد مصر, هو كمان لازم يكون عبرة لكل ظالم بعده, وإلا الرؤساء تيجي تمص دم أبونا و بعدين لما نزنقهم يطلع لنا بتوع الأخلاق الجديدة يقولك: ياجماعة!..إرحمو أحمد عز قوم ذل...


    4.ياجماعة ده كان بطل في أكتوبر:
    إيه رأيك في زين العابدين بن علي؟ كلب؟ طاغية؟ ذلّ شعبه؟ طيب ما زين العابدين بن علي كان بطل من أبطال تحرير تونس هو و الطاغية اللي قبله الحبيب بورقيبة؟, كونه "كان" بطل في أكتوبر, ميديلوش الحق يذلّ شعبه و يهينه للدرجة اللي وصلتها مصر قبل 25 يناير, تدهور علمي و صحي و أخلاقي و سياسي و ثقافي و أمني!, كونه "كان" بطل مايعفيهوش من إنه تحول لطاغية و ظالم و مسئول أول عن الفساد و الظلم في مصر, مصر مليانة أبطال غيره أصلح, وأنا متأكد إنك لو فتشت في تاريخ العادلي حتلاقيه هو كمان كان بطل في كذا مناسبة أو حادث, لكن مفيش حد بياخد ضمان ثقة مدى الحياة و مهما عمل عشان في يوم من الأيام "كان" بطل.


    5.تلاتين سنة أمان:
    آه صح, أمان بالمناسبة إتجوزت و جابت حمادة و أشرف, أمان لما كان أصغر أمين شرطة يقدر يهين أكبر أستاذ في الجامعة في أي لجنة أو كمين, أمان لما كان أصغر ظابط شرطة أو أمن دولة وأحيانا جيش ليه الحق قبلك في ركنة العربية و حجز الشقة, ممكن يحول حياتك لجحيم لو طلب إيد أختك و رفضته, أو حصل بينك و بينه خلاف في العمارة, أمان لما كان البوليس ييجي الخناقات بعد فضّها, أمان لما كان كل مصري ممكن ينزل من بيته و ميرجعش عشان ظابط شرطة اشتبه فيه أو قرر يعتقله بموجب قانون الطواريء.


    6. دول كام يوم و حيمشي خلاص نستحملهم :
    يعني العالم كله شايف على التلفزيونات الناس في البلد اللي إنت بتحكمها متظاهرين, تبعت عليهم بلطجية بسيوف و مولوتوف!, ماشي, هو غرّ ساذج و بريالة و اللي حواليه بيلبسوه الطاسة و يعملوا اللي عايزينه, هو ده بقى النموذج اللي يقدر يحكم مصر في فترة حرجة زي دي؟ مغفل حواليه كلاب و زبانية؟, وإذا كان مش عارف يحمي شعبه دلوقتي, في الوقت اللي فيه الناس متكاتفة, فمش عارف فعلا خلال الـ 200 يوم اللي فاضلين لما الناس تنزل شغلها و تنسى شوية حكاية اللجان الشعبية, حيحصل فينا إيه؟ حيعمل إيه في معارضيه؟ إذا كان مش قادر يحمي الناس اللي العالم كلها باصة عليها إنهم معارضيه!


    7.اللي في ميدان التحرير لسه قاعدين هناك ليه:
    كل يوم بسبب الناس اللي في ميدان التحرير النظام الفاسد بيقدم تنازلات و يحاول يسحب ناعم و يعتذر و يقولك حنحاكم و يصادروا أموال و يعتقلوا كلاب, كل ده بسبب الضغط عليهم شعبيا و دوليا لعدم تنفيذ مطالب اللي في ميدان التحرير, الناس اللي بتقعد تشتمهم و تخوّنهم, و بعدين الصبح لما تعرف إن عمر سليمان عمل و سوّى و صادر و اعتقل و قال تفتخر أوي بنفسك و تقول والله إحنا شعب ياكل الزلط, يا اخي اختشي على دمك, يا ترحمهم من جهلك و سذاجتك و غسيل التلفزيون المصري لمخك, يا تنزل معاهم تحقق مطالبك.


    8.حالنا واقف و مفيش شغل:
    والله دي تسأل فيها حكومتك الرشيدة اللي عايزها تقعد معاك برئيسها 200 يوم كمان, ما تروح شغلك؟, مش كل مصر بتشتغل في ميدان التحرير , و المجمع قدامه فاضي و المتظاهرين سمعوا كلام الجيش و قاعدين خارج كامل ساحته عشان ميعطلوش أي حاجة, روح شغلك و اشتغل و متشتغلش بالك باللي في ميدان التحرير, هما من غيرك بيعملوا كتير, وجودك فعلا حيفرق معاهم بعد ما تخلص شغلك و تحب تشاركهم , بس إنت بتتحجج بيهم عشان تقعد في البيت تتفرج على التلفزيون, كمان لو شغلك حكومة واقف فده مش سببه المعتصمين في التحرير, حظر التجول ده بسبب الفوضى و غياب الداخلية, الناس اللي في التحرير لما تمشي حضرتك مش حيختلف شيء في الغياب الأمني في مصر اللي سببه الهروب الكبير للشرطة و فتح السجون.


    9.حروح الشغل إزاي و مفيش أمان في الشوارع بسبب الناس اللي في ميدان التحرير:
    طيب وهي الحكومة ليه مستنية الناس اللي في الميدان تروّح عشان تنشر الشرطة و الأمن في الشوارع؟ هل مثلا عشان هي عندها شوية صغيرة باقية من كلاب الشرطة و كلاب المباحث و مفيش غيرهم يأمنوا الشوارع عشان هما مشغولين اليومين دول بالهجوم على المتظاهرين في الميدان و تنظيم هجمات البلطجية؟ صحيح هما حيعملوا إيه ولا إيه, الكل عارف إن وزارة الداخلية دلوقتي قوتها الحقيقية 40 % تقريباً, و الباقيين رافضين الرجوع للعمل في الوزارة لأسباب متنوعة, الحكومة ليه مصرة تحشد الـ 40 % حوالين ميدان التحرير؟!


    10.اللي في ميدان التحرير دول قابضين و خونة و مخربين و حرامية و موساد و عملاء للأمريكان و إخوان و شيعة و باكستانيين و أفغان و كائنات فضائية:
    طيب إنت رحت شفتهم؟ ولا القنوات المصرية دلوقتي بقت مصدر موثوق فيه؟ اللي هناك دول هما أشجع و أنضف و أشرف ناس في مصر, و بالمناسبة للي بيقول عليهم شوية شباب متحمسين عايزين مبارك يمشي فوراً, هما كمان أذكى ناس في مصر سياسياً, عشان فاهمين النظام الفاسد ده كويس, لا بيقولوا عليه بابا ولا يا جماعة ده كان بطل ولا تسليم و تسلم الكشك بياخد وقت, وفاهمين كويس إيه اللي بيضغط على نظام فاسد زي ده, و إيه معنى التوقّف عن الضغط على نظام جبان و مليان كلاب زي ما العالم كله شاف.


    11.الإخوان هما اللي في ميدان التحرير:
    فيه إخوان مسلمين هناك فعلاً, وكل يوم الإخوان المسلمين بيثبتوا إنهم فعلا مصريين بجد, و أثبتوا فعلا إنهم جديرين بثقة الناس, وده بشهادة ناس كتير و مثقفين سياسيين واعيين جدا, هما كتير فعلا هناك, بس مفيش يافطة واحدة مرفوعة عليها شعار الإخوان, ولا فرضوا على الناس هتافات دينية, ولا حرموا أي حد هناك من إنه مثلا يقعد مع صديقة ليه أو يتكلم معاها , بالعكس, سابوا الميكروفون لحازم شاهين يغني و بيذيعوا أغاني وطنية و بيسمحوا لمداخلات من كل الأطياف الموجودة في الميدان, كونهم منظمين و فاهمين سياسة ده مش عيب, ولو خايف منهم فده لإنك جاهل سياسياً و خايف من بقية شعب مصر ينتخبهم, هما فعلا كتير, و ده كان ميزة مش عيب, من غيرهم كنا حنفقد عدد محترم في مظاهرات الجمعة و الثلاثاء, و كانوا موجودين في الدفاع عن المعتصمين في الميدان ضد البلطجية بكامل طاقتهم, أنا كنت في المستشفى الميداني و شفت إزاي كان المصابين منهم فعلا عايزين يستشهدوا قدام البلطجية دفاعا عن إخواتهم اللي في الميدان, دي مش شهادة للإخوان, دي رد حق ليهم عشان الكلام الفارغ اللي بسمعه كل يوم جوا و بره الميدان, شعب مصر بعد الكلب مبارك لو إنتخب الإخوان مش حزعل, لإن ده إختيار الشعب, و الشعب لامؤاخذة مش قاصر ولا من حق أي حد يحدد له إختياراته, و الإخوان زي ما حييجوا بالإنتخابات, لو منفذوش طلباتك و نفذوا سياسات تفيدك, في الإنتخابات اللي بعدها ما تنتخبهمش و الشعب اللي كسر الكلب مبارك و حكومة القمع الأمنى, في رأيي, تقدر تكسر أي نوع من الطغيان حيكون بعده.



    12.خلينا نهدى شوية بس و نجرب الحكومة الحالية يمكن فعلا ينفذوا اللي قالوه:
    نجربهم!..30 سنة ذل و نجربهم؟, بطلجية على المتظاهرين و نجربهم؟ هما لامؤاخذة احترموا نفسهم ليه, عشان ضغطنا عليهم, هل لو الدنيا هديت فعلا حينفذوا اللي قالوه؟, النظام الفاسد ده تجريبه معناه إنك تاخد على قفاك 7 مرات و تقول معلش قالولي مش حيضربوني على قفايا تاني.


    13.الناس جعانة و مش معاها فلوس و حيموتوا بعض:
    الناس لازم تعرف إن الحرية أغلي من العيش, وإن معلش نستحمل شوية مقابل حريتنا, و لوحد جاع حيلاقي كتير يأكلوه, ولو ضاقت بيه الدنيا ممكن يروح ميدان التحرير و حيلاقي هناك أكل و شرب و كل حاجة, الناس مش معاها فلوس عشان البنوك مقفولة عشان مفيش تأمين ليها, عشان الداخلية مش فاضية للأمن وفاضية للبلطجة على الشعب.


    14.يا جماعة لازم يمشوا عشان المادة 82 و 84:
    وهما بالمناسبة كالتالي:
    المادة 82
    إذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذر نيابته عنه. ولا يجوز لمن ينوب.عن رئيس الجمهورية طلب تعديل الدستور أو حل مجلس الشعب أو مجلس الشورى أو إقالة الوزارة.

    و المادة 84
    فـى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، وإذا كان المجلس منحلا حل محله رئيس المحكمة الدستورية العليا، وذلك بشـرط ألا يرشـح أيهما للرئاسة، مع التقيد بالحظر المنصوص عليه فـى الفقـرة الثانية من المادة 82. ويعلن مجلس الشعب خلو منصب رئيس الجمهورية. ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسة.
    و الخلاصة من الوهم أعلاه هي إن وجود مبارك ضمان لتغيير الدستور الفاسد و الوزارة الحالية, وإلا بموجب الدستور الفاسد مش حنعرف نعيش في ديمقراطية و اللي حييجي حيقعد 30 سنة هو كمان!
    أصل إحنا لما مبارك يتنحى و ييجي واحد بعده ومايغيرش مواد الدستور الباطلة لا هو ولا الوزارة حنقول: لازم نحترم الدستور الفاسد المرسّخ للاستبداد السياسي عشان ده الدستور و الحكومة كمان..مينفعش يا جماعة...فين الأخلاق, بالظبط زي بابا مبارك كده ما هو فاسد و مقصّر بس احترام الكبير يا جماعة عيب مينفعش.
    طبعاً طبعاً لما مبارك يغور بكل بساطة ممكن الحكومة الانتقالية المؤقتة تقعد أقل من الـ 200 يوم بتوعه دول بنص المادة 84 و يتم اختيار رئيس "مؤقت" لتحقيق مطالب الشعب و حيكون مفروض عليه تغيير الدستور سواء رفض أو قبل وإلا الناس اللي نزلت لمبارك حتنفخه هو كمان, لحين عقد انتخابات رئاسية يختار فيها الشعب المصري رئيسه, ثم أكيد كل القضاة الموجودين بالإضافة لكل المثقفين السياسيين الموجودين مش فاهمين هذا المأزق الدستوري العظيم اللي اكشتفه عمر سليمان و أحمد شفيق و بصوا لبعض و شهقوا و قالوا: يا خرابي, ده مبارك طلع مهم !


    15. يا جماعة طيب نسيبه حقنا للدماء, إحنا تعبنا كفاية
    محدش قال إن الحرية مش غالية و مش مقابل دماء كمان, فيه ناس تعبت نفسيا و ماديا و عصبيا, و بيقولوا كله بسبب المظاهرات اللي من طرف واحد فما بالك بمظاهرات من الطرفين, المظاهرات اللي تعبتكوا دي هي اللي جابتلكم كل المكاسب اللي اتحققت, واللي كان فيه قطاع كبير من الناس اللي تعبانة دلوقتي دي ضدها في البداية و بيهاجموها بكل شراسة و خوف و جبن أحياناً, إنتوا تعبتوا نفسيا من 10 أيام, و الناس في التحرير بتموت و بتتهاجم و بتصاب و بترجع تاني تدافع عن نفسها و عن حقها في تنفيذ مطالبها, فيه ناس لو روحت بيوتها أكيد تاني يوم حيتم ملاحقتها و اعتقالها, لو تعبت إفتكر إنك أصلا كنت تعبان, إتعب شوية كمان عشان تعيش عيشة محترمة.
    Last edited by mohamadoz; 05-02-2011 at 01:10 PM.

Similar Threads

  1. خطبة القرضاوى من ميدان التحرير
    By نداء الاسلام in forum Engineers discussions
    Replies: 1
    Last Post: 19-02-2011, 05:24 PM
  2. Replies: 2
    Last Post: 08-02-2011, 08:50 PM
  3. عبر عن حبك لمصر
    By bondo2h in forum Engineers discussions
    Replies: 12
    Last Post: 15-12-2009, 12:41 PM
  4. Replies: 6
    Last Post: 12-02-2008, 03:20 AM
  5. Replies: 2
    Last Post: 31-01-2008, 01:45 PM

Tags for this Thread

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  

أقسام المنتدى

الروابط النصية

تابع جروبنا على الفيس بوك

صفحة Egypt Engineers على الفيس بوك

تابعنا على linkedin

جروبنا على الياهو جروب