إضغط لتفاصيل الإعلانات



Results 1 to 13 of 13
Share
  1. #1

    Default يوميات أثنين متزوجين قصة حقيقية بين م/ عمر ، وزوجته/ سارة !

    يوميات أثنين متزوجين


    السلام عليكم
    انا لقيت قصه جميله اوى ومفيده فحيبت احطها ليكم
    ويا رب تعجكبم
    فيه فؤائد كتيرة للمقبل على الزواج ان شاء الله

    قصة حقيقية بين :

    ( م/ عمر ، وزوجته/ سارة )


    رائعة جدًا ... جدًا ... فيها نفع ، وفقه واقع للمسألة !!

    و
    أترككم
    مع أولى حلقات هذه اليوميات النافعة الماتعة


    الحلقة الأولى
    يوم الزفاف

    أخيرًا أصبحت في شقتي – عشي الصغير إحساس جميل أن يكون للبنت بيت خاص اختارت فيه كل ركن وكل جزء على ذوقها الخاص تفعل فيه ما تريد وتشعر بالفعل إنها ملكة متوجة – أخيرا انتهت الترتيبات والمشاوير والسهر والخناقات من اجل فرش هذا العش الرائع الصغير – أخيرا انتهى ضجيج الفرح وتفحص المعازيم في كأني هابطة من المريخ وكل واحدة من عواجيز الفرح تمصمص شفايفها وتقول ( مش كانت بنتي أحسن ؟ ) – تعبت جدا من حمل الفستان الثقيل والحذاء الضيق – سبحان الله هو كل أحذية العرايس بتكون ضيقة ليه ؟ وأخيرا أخيرا ح أكون لوحدي – أيه ده صوت عمر بيقول ( مدام عمر أجمعِ عندي بالخطوة السريعة ) !!! مدام ؟ أنا يا بيه ؟؟
    - أيه يا ستِ سرحانة في أيه ده كله ؟؟! هو علشان مفيش حد في جمالك النهاردة يبقى خلاص ؟ لا يا هانم أنا لما انده عليكِ تيجي قبل ما انده مفهوم ؟ وبعدين فين القطة علشان اذبحها لكِ ؟!
    - أنت عاوز تأكل قطط النهاردة ولا أيه ؟ لو ذبحتها ح اطبخها لك فورًا !!! .
    - تطبخيها ؟!! بنات آخر زمن يعنى مش خايفة مني ؟
    - لا مش خايفة ، فرحانة جدًا ، وأنت ؟
    - أنا أسعد إنسان في الدنيا .... أول مرة بنتكلم أنا وأنتِ من غير ألف محرم وعزول في بيتنا الجميل بجد البيت رائع ، ذوقك طلع يجنن ... يا سارة لما كل حاجة أتفرشت وأجمل ما فيه أن حبيبتي فيه – لا لا مفيش كسوف خالص خلصنا الحدوتة ديه – شوفي أنا بأقول علشان ربنا يكرمنا في حياتنا نصلى أنا وأنتِ ركعتين نبدأ فيهم حياتنا علشان ربنا يبارك لنا كل خطوة ... ماشى ؟
    سارة : ماشى يا حبيبي ......
    - حبيبي ؟!! لا يا ستِ قومي غيري هدومك وتوضئي أحسن كده مش مصليين خالص !!!
    قمت ودخلت حجرة النوم ولا أدرى عندما دخلتها لماذا ارتجفت ؟؟! الله يسامح كل البنات اللي رعبونا لما أتجوزوا ليه يعني هي حرب ؟ أنا مش ح أفكر في حاجة علشان ما اديهاش عياط من أولها ....
    يا خبر أيه كل الجيبونات اللي في الفستان دى أنا كنت شايلة حديد زى المصارعين مش فستان ... لازم يعذبوا البنات في كل شيء والله حرام الغلب ده ... غيرت الفستان بأعجوبة وارتديت عباءة جميلة مطرزة ولم أجرؤ أن ارتدى الطقم الذي أوصتني أمي أن أرتديه ... العالم ديه بتهرج أكيد !!!
    وتوضئت في حمام غرفة النوم وأزلت مكياج الفرح وأسدلت شعري ليراه عمر لأول مرة ، وخرجت له لأجده غير البدلة وارتدى البيجاما التي أوصاني العالم كله أن أهديها له وكأن الجوازة ستفشل لو لم تهدى العروس عريسها بيجاما يوم الزفاف ، وسيكتب الخبر في الصفحة الأولى ، وجدته ينظر لي نظرة كلها إعجاب وحب واستقبلني مهللاً ( أنا عرفت دلوقت ليه الحجاب فرض لو كنتِ بتخرجي بشعرك الجميل ده كانت حصلت مظاهرة ) يالا يا ستِ نصلى أحسن كده مش ح ينفع خالص .
    وصليت وراء زوجي لأول مرة وأحسست إحساس رائع أن زوجي الإمام ، وأنَّ الله شاهد علينا ونحن نبتهل بين يديه أن يرزقنا السعادة والتوفيق ، ودعا عمر دعاء طويل وأمنت عليه وأنا أدعو من قلبي أن يحقق الله كل كلمة فيه ، وأن يكون زوجي الحبيب حبيبًا طوال العمر ، وألا يفرقنا إلا الموت وألا يدخل الشيطان بيننا أبدًا ......
    وأنهينا الصلاة وجلسنا وأحتضن عمر يدي في يده لأول مرة !!! فارتجفت وظهر على ارتباكي وصاحبني خوفي !! ، واسترجعت كل الحكايات المفزعة التي سمعتها من أغلب البنات وواضح أن خوفي كان ظاهرًا عليّ وكأن عمر قرأ أفكاري فوجدته يحنو على ويقول: أيه يا سارة الرعب ده كله .. أيه يا حبيبتي هي حرب ؟! لا تخافي من أي حاجة خالص ، وسيبك من الأوهام ديه وحواديت البنات الفارغة ... لو كان الارتباط مفزع كده ما كانش – لم يكن - الإسلام سمى الليلة هذه ليلة البناء !! - يعنى الزوجين بيبنوا حياتهم في الليلة هذه - وكان سماها ليلة الحرب العالمية مش كده ويا ستِ علشان تطمئني أنا عاوز أتكلم معاكِ ، واستمتع أن أنا وأنتِ لوحدنا لأول مرة وبعدين كل حاجة تيجى على مهلها ماشي يا قمر ؟
    سارة : أحسست بجبل أزيح من فوق صدري ، وشكرت تفهم عمر ورقته المتناهية وتحدثنا طويلاً طويلاً ، كأن طوال عمري لم أتحدث وكان أعذب حديث شعرت به في حياتي ، أتكلم مع زوجي حبيبي ، وفتحت له قلبي وسقط حاجز الخجل مني وفتحت قلبي ، وأخرجت كنز المشاعر التي كنت أخبؤها من يوم أن تشكلت أنثى إلى اليوم وأعطيتها إلى الرجل الذي ارتبطت به ، ووقتها عرفت عظمة الإسلام في تحريم العلاقات المحرمة والصحوبية ، وإلا كيف تشعر الفتاة بهذا الشلال من المشاعر الفياضة البكر ، لو كانت ألقت مشاعرها لهذا وذاك ووصلت إلى زوجها وهى مليئة بمرارات التجارب الفاشلة ؟؟!! ... وشيئًا فشيئًا سقطت الرهبة والحواجز بيننا ، وتحدثت القلوب ، والعيون ، و............. سكتت شهرزاد عن الكلام المباح ..... !!!!

    الحلقـة الثـانيـة
    الصباحيّــة


    قــالت ســارة : استيقظتُ من نومي وأنا لا أدري أين أنا .. وأخذتُ أتفحص المكان بدقة وأنا أبحث عن حجرتي القديمة فلا أجدها ، ووجدت عمر نائم على السرير فانتفضت وكدت اصرخ في وجهه.. ثم تذكرت كل شيء .. وأخذت أضحك في سرّي وأنا أتذكر أمي وهي تقول لي: أنتِ يا سارة لما بتصحي من النوم ممكن تطلبي البوليس للّي قدامك عقبال ما تعرفي أنتِ فين ؟!
    عندها حق – أمي - لازم أتخلص من العادة ديه مش كل يوم ح أصحي الراجل مفزوع كده .
    وأفقت لأجد أن جرس التليفون يرنّ منذ فترة ، وخرجت على أطراف أصابعي حتى لا أوقظ عمر ... ووجدتها ماما كما توقعت .. الحمد لله إنها لم تكن حماتي
    ماما: صباح الخير يا ست العرايس .. صباحيّة مباركة .
    أنا: صباح النور يا حبيبتي .
    ماما: أنا لم أنم خالص قلقة عليكِ يا سارة ! .
    أنا: الحمد لله كويسة - آه لو الأمهات تبطل القلق ده - .
    ماما: طيب يا سارة إحنا ح نجيلك بعد الظهر شوية .
    أنا: تنوّري يا ماما .

    طبعًا ماما أُحبطت من ردي .. خلاص فعلا حاسة إن لي حياة مستقلّة ، وأني لستُ في حاجة ، إني أقول كل شيء لماما ... وبعدين عاوزة ماما تتعود على الوضع ده علشان ما يحصلش مشاكل بعد كده !! .
    وضعت السماعة لأجد التليفون يرنّ مرة أخرى .. واضح إن تليفوننا هو الوحيد في مصر .. لأجد مكالمة مشابهة من حماتي وإنهم برضه ح ييجوا بعد الظهر
    والدعوة عامة وحتبقى لمه !!

    ***********

    استيقظ عمر وهو يبتسم ويقول: صباح الفل يا حبيبتي ، اهو ده الصباح ولاّ بلاش .. بجد ملكة حتى وأنتِ صاحية من النوم .
    ابتسمتُ له وقلت أَسِّدّ نِفسه بسرعة فأخبرته أن كل العالم ح ييجيلنا بعد الظهر يعني بعد ساعة تقريباً .
    ووجدته يقول: يا ستِ يشرّفوا ، بس بجد المفروض إن الأهل يسيبوا العرايس شوية يأخذوا على الوضع الجديد ، وعلى الحياة الجديدة مش هجوم كده من أولها.. ماهمّ لسه سايبنّا من كام ساعة .. حيكون حصل لنا أيه يعنى ؟ .. وبعدين أنا لم أنم طول الليل من شخيرك يا سارة – وجه مبتسم - شخيري !!! ؟
    وكان ردي أن قذفته بكل خداديات الأنتريه ، ولقّنته درسًا لا ينساه في احترام حرمه المصون اللي هيّ أنا . ( ابتسامة ) .
    عمـر: يا ستير يا رب ده أنتِ شرّانية أوي .. الواحد ما يعرفش يهزّر معاكِ شوية ؟
    أنا: لا يا سيدي ما عندناش رجالة يهزروا .. يالاّ تعالى نشوف ح نقدم للجماعة أيه
    ، ودخلنا المطبخ وأعددنا ما سنقدمه للضيوف ، وأعدنا ترتيب المنزل علشان الناس اللي ح تيجي تتفرّج على الفرش الجديد ، وغيّرت ملابسي وارتديت طقم جديد وحذاء بكعب عالي لأول مرة وربنا يستر وأعرف امشي فيه !! ، وخلاص بقى سأعيش في دور المدام .. وجدت الباب بيرن ووجدت الأسرتين سوا مش عارفة أزاي ؟ !
    لقيت نفسي مفروض أستقبل حوالي 18 فرد مرة واحدة .. ليه كده بس ؟
    ما علينا .. المشكلة الأزلية إن الناس اللي بتيجي بتتفرّج على كل الشقة حتى المطبخ ، يعني المفروض أن أول ما الناس يشربوا حاجة أغسل الكاسات فوراً علشان الفرجة تبقى كاملة .
    وهكذا لقيت نفسي تحولت إلى نحلة مكوكية أشيل ، وأحط – أضع - ، وأغسل وأفرّج الزباين !! اللي هما العائلتين يعني ..
    أقصد الضيوف.. على الشقة حتة حتة .
    ومش عارفة ليه العروسة بتفتح النيش والدواليب ، وكل الفرش ، وكل الأطقم لكل واحد ييجي ؟؟ .. فعلاً حرب المفروض الضيوف ييجوا يقعدوا في الصالون فترة بسيطة ويلقوا نظرة سريعة على الفرش ويباركوا ويمشوا وخلاص ، وبلاش التفتيش الذاتي ده ..
    لكن تقول أيه الواحد كان أتجوز في الصين أحسن !

    ***********

    قــال عمــر : أيه الشغلانة ديه ؟.. ده بيت أبويا ما كانش زحمة كده
    الناس ديه ح تمشى متى ؟ !
    أنا تعبت.. وسارة يا عيني ما قعدتش لحظة ، ولمّا جيت أشيل معاها الصواني ماما قالت
    لي: يعني عمرك ما ساعدتني في البيت يا عمر ؟
    الحمد لله إن سارة كانت في المطبخ مش ناقصين نكد .

    ***********

    قــالت ســارة : وأخيراً أخيراً مشوا ، وأنا أكاد أبكي من التعب لأني أصلاً لسه تعبانة من مجهود الفرح .. حرام الظلم ده .
    وجدت ماما تميل على وهيّ ماشية وتقول لي خلى بالك من نفسك يا سارة ، وما تتعبيش نفسك ( مش عارفة إزاى ؟ ).. وعلى فكرة خالك وخالتك وأولادهم جايين لكم بعد العصر شوية ، وعمة عمر وجوزها وأولادها جايين بالليل !!!!!!!!

    حراااااااااااااام
    ***********

    قــالت ســارة : يااااااه.. ديه فعلاً حرب .. أيه كل المهنئين دول أنا حاسة إني كنت عانس مثلاً !! ، ومصر كلها مش مصدقة أنى أتجوزت فجايين يتأكدوا بنفسهم أحسن تطلع إشاعة . !! .
    ضيوف ضيوف ضيوف طول النهار والليل ومفروض أكون طول الوقت مستعدة ولابسة لبس في منتهى الشياكة ، وكعب عالي حتى لو لطعونا ساعتين ، أو ثلاثة . مش مهم ..
    كعادة المصريين يقولوا لك: حنعدي عليك آخر النهار .... !!
    الكلمة ديه بتثير جنوني .. يعني الساعة كام ؟ وطبعًا لازم البيت يبقى مفيش فيه ذرة تراب ، أو طبق في الحوض طوال اليوم علشان حملة التفتيش الذاتية ، وتكون النتيجة إننا مش عارفين نخرج ، ولا نتفسح ، ولا حتى الواحد يقعد على راحته حاجة تفلق !!

    ***********

    قــال عمــر : هو الجواز ح يطلع مقلب ولا أيه يا رجالة ؟؟
    أنا حاسس إني في الصين الشعبية .. رجالة وستات والكارثة في الأطفال اللي مش بيحلى لهم أكل الشيكولاتة ، ومسح أيديهم إلا في الصالون اللي الواحد دافع فيه دم قلبه !! ..
    واللي يفرس ويغيظ أكتر موضوع الهدايا ده .. كل واحد جت له هدية مش عجباه ييجي ويديها لنا وطبعًا إحنا كمان مش محتاجينها ، وقليل جدًا الهدايا النقدية .. الواحد بقى على الحديدة من مصاريف الجواز والفرح وقلنا ستفرج من نقوط الفرح يقوموا يدوها هدايا مالهاش لازمة ؟ ده الواحد كده مش ح يعرف يعمل منظر في شهر العسل ولا أيه و مش ح اعرف أفسح سارة في مكان كويس ؟
    شكلها كده ح ترسى على شقة خالي في إسكندرية مع سلفة مالية من أبويا لا ترد .. وربنا يستر وما تحصلش مشاكل

    ***********

    قــالت ســارة : نقعت رجلي في ماء وملح من كثرة الوقوف ، وأخذت قرص مسكن وأنا أعاني من علامات كساح مبكر !! ... ونزعت فيشة التليفون كي لا يتصل أحد آخر ويتحفني بالخبر الميمون : إنه جاي في السكة .
    وأغمضت عيني .. وجدت عمر يضع يده على جبيني ويقول لي : سلامتك يا حبيبتي من التعب.. معلش أنا ح أريحك حالاً.. يالاّ قومي رتبي الشنط سنسافر حالاً
    رددت كالملسوعة: أيه .. أقوم ؟ .. وكمان نسافر حرام عليك أنا سأموت خلااااااااااص أنا مش ح أتحرك أبدًا من هنا .
    عمـر: يا حبيبتي مفيش حل آخر .. أنا خلاص ح أتجنن من كثرة الدوشة ، لازم نهرب من هنا ، ونستمتع بشهر العسل أنتِ ناسية إننا ح نرجع شغلنا بعد أسبوع ؟
    أنا: طيب والفلوس يا عمر ؟
    عمـر: ولا يهمك يا حبيبتي جوزك اتصرّف .. جيب السبع ما يخلاش

    أنا: طيب والناس اللي عمّالة تيجي دي حيتجي ما تلاقيناش ؟
    عمـر: أحسن ... يبقوا يقعدوا مع البواب .. والله ده أنا مسافر مخصوص علشان أهرب منهم ونكون أنا وأنت بس في الدنيا .
    أنا: طيب مش أستأذن ماما وبابا الأول ؟
    فنظر إليَّ عمر بغضب هائل وقال لي: قومي لدوقتي يا سارة حضري الشنط حالاً سنسافر بعد ساعة .. قبل ما أفقد أعصابي .
    فانتفضتُ من أمامهِ لأحضر الشنط فورًا وأنا لا أعرف ماذا أغضبه إلى هذا الحد..
    علشان قلت أستأذن بابا طيب ما أنا لسه مش واخده على دور المدام ده .. واضح إني
    متزوجة أسد ، وأنا مش واخدة بالي .
    وفي السيارة أخذت بالي أني أول لأول مرة أركب مع عمر لوحدنا كان إحساس رائع والأجمل أنى تركته هو يقود الدفة ويوجهنا إلى حيث يشاء .
    إحساس جميل بإلقاء المسئولية على الرجل وأنتِ تنعمي بالراحة والاطمئنان ... سبحان
    الله حتى القوامة للرجل التي تغضب منها النساء ؛ ما أجملها من إحساس
    وأغمضت عيني ونمت .. واستيقظت لأجد نسيم الإسكندرية الرائع ، وعمر يوقظني كطفلة صغيرة ويقول لي: قومي بقى يا عروسة .. وصلنا شقة خالي اللي حكيت لكِ
    ، عنها وصعدنا الشقة ووجدتها صغيرة ، لكن مشرقة وجميلة وأخذ عمر يفرجني على جميع الغرف وخرجنا البلكونة لنستمتع بمنظر البحر الرائع ولكني وجدت فتاة جميلة وجذابة ذات شعر حريري وقوام ممشوق في مثل سني تقريبًا في البلكونة المجاورة لنا تمامًا صاحت عندما رأت عمر وقالت بدلال كبير: حمد الله على السلامة يا عمر ، مش كنت تقول لي إنك قادم ؟.. كده أنا زعلانة منك ، ثم انتبهتْ أخيراً إلى الحشرة الموجودة بجواره اللي هي أنا وقالت بتساؤل ممزوج بغضب: مين دي يا عمر ؟؟ !!
    يُتبع إن شاء الله
    Last edited by marwa said; 18-05-2008 at 11:55 AM.


  2. Facebook Comments - تعليقـك على الفيس بوك يسعدنا ويطور مجهوداتنـا


  3. Forum Ads:

  4. Forum Ads:

    اضفط هنا لمعرفة تفاصيل الإعلانات بالموقع


  5. Forum Ads:

    -->

  6. #2

  7. #3
    Join Date
    Jan 2008
    Posts
    106
    Rep Power
    13

    Default

    جميله اوي يا مروه بس ياريت متأخريش علينا

  8. Forum Ads:

  9. #4

  10. #5
    Join Date
    Jan 2008
    Posts
    1,785
    Rep Power
    14

    Default

    شكرا ليكي يامروه
    انا كنت حطيت بداية القصه قبل كده من اول الخطوبه
    بس مالقتش فيها تجاوب فعشان كده ماكملتش
    كملي القصه ولو عايزين احطلكم ايام الخطوبه ممكن اكملها

  11. Forum Ads:

  12. #6

    Default

    Quote Originally Posted by bondo2h View Post
    شكرا ليكي يامروه
    انا كنت حطيت بداية القصه قبل كده من اول الخطوبه
    بس مالقتش فيها تجاوب فعشان كده ماكملتش
    كملي القصه ولو عايزين احطلكم ايام الخطوبه ممكن اكملها
    ايوة يا بندقه
    بس معنيش فترة الخطوبه
    انا عندى بس بعد الجواز
    وبصراحه جميله اوى
    دا راى الشخصى
    على العموم انا احط الحلقه التالته
    لو ملتقش تجاوب فيها
    خلاص مفبش مشكله مش لازم اكمل
    no problem

  13. #7

    Default الحلقه التالته

    الحلقـة الثـالثـة


    قــالت ســارة : وقفتُ ارتجف من الغضب والدهشة والحيرة من هذه التي جاءت لتهدم أحلامي في السعادة وتحادث حبيبي بكل هذا الدلال والذي يحمل في طيّاتهِ الكثير من الذكريات المشتركة بينهما .. من أولها كده يا ربي – قدر - ؟
    لا أقدر حتى على المواجهة .. أشعر أن كلامي سيكون صراخًا.. وأنا لا أحب أن تسمع الآنسة المبجّلة الملاصقة لنا إني أتشاجر معه بسببها ، فهي هكذا ستشعر بانتصار
    نظرتُ لعمر نظرة ناريّة تحمل غضب العمر كله ، وتركته ودخلت لحجرة النوم ووجهي مشتعل من الغضب وأخذت أغرز أظافري في الوسادة حتى كادت أن تتمزق من ضغط يدي ، وأنا أغالب الدموع بشدة .. فتبعني عمر ووضع يده برقة على كتفي وقال لي بكل براءة : مالك يا سارة فيه حاجة ؟
    فنظرتُ إليه نظرة نارية أخرى وأزحت يده من على كتفي وصرخت فيه: وكمان بتسأل مالِك ؟ .. أنا اللي عاوزة أعرف مين الهانم ديه ، وإزاي تكلمك بالدلع ده كله ؟ ..
    وأيه اللي كان بينك وبينها ، أو يمكن لحد لدوقتي كمان ؟!
    رد باستنكار: لحد لدوقتي ؟ حاسبي يا سارة أنتِ كده بتغلطي
    قلت بعصبية: طب يا سيدي ما تزعلش .. أيه اللي كان بينك وبينها.. يالا احكي لي أنا نفسي أشوف فيلم رومانسي من زمان .. وأوعى تقولي مفيش حاجة .. من فضلك أنا مش طفلة قدامك .
    رد برفق كأنه خائف على أن أموت من فرط ثورتي: طيب ممكن تهدّي نفسك علشان نعرف نتفاهم ؟
    رددت وأنا ارتجف: مش ح أهدى ، إلا لما تقول لي كان فيه حاجة ولاّ لأ ؟
    صمتَ طويلاً قبل أن يجيب بصوت لا يُسمع: أيوة كان فيه !!!!!!!!!
    ***********


    انهرتُ عندما سمعت هذه الكلمة الكريهة وتمنيت ساعتها لو كان كذب عليَّ ، أو أنكر أو فبرك أو أخترع لي أي حكاية ... وأنا كي أُرضي غروري الأنثوي سأبتلعها .. لكن أن يعترف أمامي هكذا .. ولم استطع أن أواصل التفكير أكثر فانهارت دموعي بلا توقف .
    أخذني عمر بين أحضانه وهو يهديني كطفل صغير يرفض النوم .. وقال لي: الحمد لله.. أنا عرفت لحد دلوقتي حاجتين .. أنك مجنونة ، وعرفت انك بتحبيني جدًا .. وإلا أيه
    لازمة الجنان اللي أنتِ عاملاه ده ؟ ! .
    وهممت أن أرد ولكن أغلق فمي بيده وهو يقول: بصّي يا سارة لغة الصراخ ديه مش ح توصّل لحاجة أبدًا ، أنا ح أقول لكِ على كل حاجة بس لما تهدي الأول خلاص ؟
    مسحتُ دموعي كالأطفال وأنا أقول: أتفضل احكي بس إياك تكذب !! .
    مسح دموعي هو أيضاً برفق وقال لي: يا حبيبتي ما كنت كذبت من الأول ، وخلصت من الفيلم ده وضحكت عليكِ وخلاص .. بصي يا ستِ .. أنتِ عارفة إن ديه شقة خالي من زمان جداً ، ومن وإحنا أطفال ، وإحنا بنيجي نصيف هنا ، وساعات نقضي بالشهرين هنا .. وأنتِ شايفة إن الشقق لازقة في بعض ، وطبيعي جدًا ح يكون لينا علاقة بالجيران .. وشيرين يا ستِ بنت الدكتور محمود جارنا ؛ خريجة ألسن وخريجة مدارس لغات وبنت مثقفة وجميلة زى ما أنتِ شفتي .
    قلت بعصبية: من فضلك بلاش الغزل ده قدامي ... انتووا متفقين عليّ ولا أيه ؟!
    فقال لي: لا يا حبيبتي ده أنتِ حبي وعمري كله والله .. المهم أنا يا ستِ أحسستُ في فترةٍ من الفترات إني ميّال لها ، وهي كمان بادلتني نفس الشعور ، بس عمري ما حسيت انه حب مكتمل .. كل ما كنت آجي أأخذ خطوة ارجع خطوتين ... حتى أنى لم أصارحها أبدًا بحبي لأني لم أتأكد أبدًا من مشاعري تجاهها ولم تُشعرني هي أبدًا بالاستقرار .
    ***********


    لا أدري لماذا وقتها بعدت الغيرة الحارقة قليلا.. وشعرتُ أني أُحادث صديقًا يقصُ عليَّ مشكلة وليس زوجي .. وسألته : ليه.. كانت أيه المشكلة بينكم ؟
    قال: المشكلة كانت جرأتها الشديدة ، وإنها دائمًا مقتحمة ؛ وتكلم أي شاب أو رجل بمنتهى البساطة والودّ ولو ما كنتش عارف أخلاقها وتربيتها وأسرتها كنت شكّيت في أخلاقها .. ولكن تكويني كرجل شرقي متديّن لم أقدر أني اقبل وضع زى ده ، وكلمتها عدة مرات ولكن بلا فائدة فثقافتها وطريقة دراستها وتربيتها المميزة تجعلها شديدة الثقة بنفسها ، حتى أنها لا ترى أن حاجز الحياء في الفتاة له مبرر .. وهكذا أخذت قرار نهائي بالابتعاد وخاصة أنني لم اكلمها في شيء صريح عن مشاعري وابتعدت عن هذه الشقة لمدة عامين حتى لا أراها ، ودخلتها فقط في شهر العسل اللي حبيبتي عاوزة تقلبه غم !!
    هدئتْ دموعي وأنا أشعر بحرارة صدق كلامه ، لأنه لم يكن مضطرًا أن يخبرني كل هذه التفاصيل لو لم يكن صادقًا وسألته: طيب يعني حبيتها بجد ؟!
    أجاب بسرعة: لا والله .. بجد كان مجرد انجذاب مش حب .. وإلا كنت أتغاضيت عن عيوبها وخطبتها .. أنا لن ولم أحب في حياتي إلا مجنونة واحدة عمّالة تعيّط زي الأطفال.
    سألته: أمال بتكلّمك كده ليه زي ما تكون زوجتك ، وظبطتك مع واحدة تانية ؟
    رد عليَّ قائلاً: يا حبيبتي ما هي أسلوبها كده .. أعملّها أيه يعني ؟ .. خلاص بقى يا سارة هو إحنا نخلص من الضيوف تطلع لنا الست هانم ديه ؟ .. سبحان الله ده أنا سمعت عن شهر العسل ده حواديت ألف ليلة وليلة .. واضح إنك أخذت مقلب يا واد يا عمر ..
    يا ريتك كنت تزوجت شيري .
    اغتظت من الكلمة فقلت: شيري ؟! طيب روح لها بقى يا أخويا خليها تنفعك
    ، وأخذتُ أدفعه خارج الحجرة وأغلقتُ الباب على نفسي من الداخل ، وأنا أشعر إن جبل قد أزيح من على صدري ، وإني ضخمت الموضوع بغباء قبل أن أعرف الحقيقة ..
    كم هي قاسية الغيرة !! ، وكم أعشق هذا الرجل الأسمر بجنون !! .
    وفي الخارج كان عمر يدق على الباب وينادي: افتحي يا سارة الله يهديكِ .. يا بنتي
    افتحي أنا تعبت .. طيب علشان خاطري .. ده الضيوف أهون يا شيخه .. يا مجنونة افتحي .. طيب يا سارة خلاص براحتك ، أنا سوف أنزل شوية ، لكن خلّي بالك الحجرة اللي أنتِ فيها ديه كان دائمًا فيها فار !!!.. مع السلامة يا حبيبتي بقى .
    وطبعًا فتحت الباب كالملسوعة وأنا اصرخ: فاااااااااار ؟ .. وأجرى كي ألحق عمر قبل أن يتركني مع الفأر وحدي نقضي شهر العسل سويا !! وخطوت خطوة واحدة ..
    وجدت نفسي بين ذراعيه وهو يضحك ولم أستطع الهرب ولا الكلام ...... !!
    وسكتت شهرزاد عن الكلام المباح ... !!
    يُتبع إن شاء الله تعالى

  14. #8

  15. #9
    Join Date
    Jan 2008
    Location
    I will check and and answer you
    Posts
    113
    Rep Power
    13

  16. #10
    Join Date
    Jan 2008
    Posts
    1,785
    Rep Power
    14

  17. #11
    Join Date
    Jan 2008
    Posts
    106
    Rep Power
    13

    Default

    ليه يا بندقه مكملتيش ايام الخطوبه انا كنت متابعها بس لاقيتك مكملتيش مره واحده ياريت تبعتيها تاني

  18. #12
    Join Date
    Jan 2008
    Posts
    106
    Rep Power
    13

    Default

    رائع يا مروه بس خليها حلقتين مش حلقه
    هههههه

  19. #13

Similar Threads

  1. Replies: 139
    Last Post: 08-11-2009, 06:35 PM
  2. خش ومش هتندم
    By zezo1901 in forum Networks
    Replies: 9
    Last Post: 15-08-2009, 10:36 PM
  3. .. سارة ..
    By aboud87 in forum Engineers discussions
    Replies: 3
    Last Post: 19-10-2008, 10:26 AM
  4. Replies: 3
    Last Post: 07-09-2008, 01:38 PM

Tags for this Thread

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •  

أقسام المنتدى

الروابط النصية

تابع جروبنا على الفيس بوك

صفحة Egypt Engineers على الفيس بوك

تابعنا على linkedin

جروبنا على الياهو جروب